Сирия билігі ел аумағында толықтай оқ атуды тоқтату режимін жариялады
Сирия президенті әкімшілігі ел аумағының барлық бөлігінде жан-жақты оқ атуды тоқтату режимі енгізілгенін мәлімдеді, деп хабарлайды Anadolu агенттігі.
АЛМАТЫ, NEGE. «Сирия халқы арасындағы қантөгісті болдырмау, сондай-ақ мемлекеттің ұлттық әрі гуманитарлық жауапкершілігі негізінде елде жан-жақты оқ атуды тоқтату туралы шешім қабылданды», — делінген ресми құжатта.
Сирия билігі қақтығысқа қатысы бар барлық тарапты мемлекеттік мекемелер мен қауіпсіздік күштеріне тыныштық орнату, жағдайды тұрақтандыру және бейбіт тұрғындар арасындағы құрбандардың алдын алу үшін қажетті кеңістік беруге шақырды.
Мәлімдемеде барлық әскери қақтығыстар мен қарулы әрекеттерді дереу тоқтату, бейбіт тұрғындардың қауіпсіздігін қамтамасыз ету және гуманитарлық көмектің кедергісіз жеткізілуіне кепілдік беру қажеттігі баса айтылған.
Президент әкімшілігінің мәліметінше, Сирияның қауіпсіздік күштері елдің бірқатар аймағында орналасып, бітімнің сақталуын бақылауға, қоғамдық тәртіпті қадағалауға және халықтың қауіпсіздігін қамтамасыз етуге кірісті. Бұл шаралар елдегі тұрақтылық пен тыныштықты нығайтуға бағытталған.
