Павлодарда еліктерді заңсыз атқан ауыл тұрғыны ұсталды
Заңсыз аңшылықпен айналысқан браконьерден мылтықтар тәркіленген. Сондай-ақ автокөлік салонынан табылған екі еліктің өлексесіне сот-биологиялық сараптама тағайындалды.
Алматы, NEGE. «Браконьер» жедел-профилактикалық іс-шарасы аясында полиция қызметкерлері Железин ауданының Раздельное ауылы маңында ВАЗ-21060 маркалы автомашинасын тоқтатып, салоннан екі еліктің өлексесін тапты.
— Көлік рөлінде ауыл тұрғыны болған. Автокөліктің салонын тексеру кезінде аңшылық мылтықтар, жабайы жануарлардың екі өлексесі табылды. Заңсыз аң аулау дерегі бойынша сотқа дейінгі тергеу жүргізіліп жатыр. Еліктердің тәркіленген ұшаларына сот-биологиялық сараптама тағайындалды. Автокөлік айыппұл тұрағына қойылды, — деп хабарлады Павлодар облысы полиция департаменті жергілікті полиция қызметінің бастығы Қуаныш Мұстафинов.
«Браконьер» іс-шарасы басталғалы бері полицейлер табиғатты қорғау заңнамасының 95 бұзушылығын, оның ішінде аңшылық және балық аулау ережелерін бұзуды тоқтатты. 900 килограмнан астам заңсыз ауланған балық тәркіленді.
