Өрт сөндірушілер заманауи ғимаратқа ие болады: Наурызымда №20 бөлімшеде күрделі жөндеу жұмыстары басталды
Бұл ғимарат 1965 жылы салынғаннан бері алғаш рет күрделі жөндеуден өтуде. Яғни, 60 жылға жуық уақыт бойы жөндеу көрмеген. Уақыт өте келе ғимараттың техникалық жағдайы нашарлап, жаңғырту қажеттілігі туындады.
Қостанай, NEGE. Бүгіннен бастап нысанды толық қалпына келтіру және жаңарту жұмыстары қолға алынды. Жоспар бойынша шатыр, қасбет, ішкі бөлмелер мен инженерлік жүйелер жөнделіп, өрт сөндірушілерге жайлы жұмыс жағдайын жасау көзделіп отыр.
Өрт сөндірушілер – халықтың қауіпсіздігі мен өмірі үшін күнделікті тәуекелге баратын жандар. Сол себепті олардың қызмет ету жағдайын жақсарту – азаматтық қорғаныс жүйесін күшейтудің маңызды қадамы.
Жөндеу жұмыстары кезең-кезеңімен жүргізіліп, ерекше бақылауда тұр. Жаңартылған ғимарат алдағы уақытта заманауи, ыңғайлы әрі кез келген төтенше жағдайға дайын мекеме ретінде қызмет атқаратын болады.
