Өмір бойына жарыстардан шеттетілген Алексей Нидің жаза мерзімі қысқартылды
Өмір бойына жарыстардан шеттетілген ауыр атлетикадан ұлттық құраманың бұрынғы бапкері Алексей Нидің жаза мерзімі 4 жылға дейін қысқартылды, деп хабарлайды Prosports.kz.
Алматы, NEGE. Ауыр атлетикадан Қазақстан құрамасын жаттықтырған Алексей Ни өткен жылдың қараша айында өмір бойына спорттан шеттетілген болатын. Алайда Халықаралық тестілеу агенттігі (ITA) бұрынғы шешімін өзгертіп, жаза мерзімін 4 жылға дейін қысқартты.
Алексей Нидің жазасына қатысты шешім ұлттық құраманың 2008 жылы Пекинде, 2012 жылы Лондонда және 2016 жылы Рио-де-Жанейродағы Олимпиадаларда болған допинг жанжалына қатысты қабылданған болатын.
Қазақстан құрамасының бұрынғы бас бапкеріне берілген жаза мерзімінің қысқарғанын Қазақстан ауыр атлетика федерациясы растады.
ІТА Алексейдің ғана емес, туған інісі Виктор Ниге де қатысты шешімін қайта қараған көрінеді. Ол да ұлттық құрамада аға жаттықтырушы болған.
