Олимпиада чемпионы Михаил Шайдоров елге оралды
25 ақпанға қараған түні Астана халықаралық әуежайында XXV қысқы Олимпиада ойындарының чемпионы Михаил Шайдоровты салтанатты қарсы алу шарасы өтті.
Астана, NEGE. Мәнерлеп сырғанаудан ерлер арасында Қазақстан қоржынына тарихи алтын салған Михаил өзін қолдаған барша жанға тағы да алғысын білдірді.
«Ақыры елге жеттім-ау! Мені қарсы алу үшін түн ортасында әуежайға келген барша жанға алғысымды білдіргім келеді. Расымен қатты ризамын. Олимпиада ойындарында туымыз ең биік, құрметті жерге ілінген кезде елім үшін бойымды мақтаныш кернеді.
Маған көптеген жылы сөздер айтылды. Мені қолдап жүрген баршаңызға шын жүректен алғыс айтамын. Осындай керемет сыйлықтарыңызға рахмет! Шынымды айтсам, айтарға сөзім жоқ. Қолдау танытқандарыңызға көптен-көп рахмет! Бұл – ары қарай дамып, еліміздің атын шығара беруге зор мотивация. Барлығыңызға рахмет!» – деп ағынан ақтарылды чемпион сахнада.
Ұшып келгеннен кейін мәнерлеп сырғанау федерациясы Милан триумфаторына үш бөлмелі пәтердің сертификатын табыстады, ал Софья Самоделкина мен олардың жаттықтырушыларына бір бөлмелі пәтерден берілді.
Айта кетейік, Италияда өткен XXV қысқы Олимпиада ойындарында Михаил Шайдоров жеңіп алған алтын медальдің арқасында Қазақстан құрамасы жалпы есепте 19-орынға тұрақтады.
Спорт және туризм министрлігінің мәліметінше, ұлттық құрама 1994 жылдан бері алғаш рет қысқы Олимпиадада үздік 20 елдің қатарына енді.
