«Қала әкімінің бұрынғы орынбасары ұсталды»
Тараз қаласы әкімінің бұрынғы орынбасары Нұрбол Қалдыбаевты Антикор ұстағаны туралы хабар кеше тарады. NEGE тілшісі деректі нақтылауға тырысты.
«Бүгін кешке (11 желтоқсан – ред.) Антикор Тараз қаласы әкімінің бұрынғы орынбасары Нұрбол Қалдыбаевты уақытша ұстау изоляторына қамады.
Қалдыбев 21 қараша күні отставкаға кету жөнінде арыз жазғаны белгілі болды. Ол құрылыс және тұрғын үй коммуналдық шаруашылығы саласын басқарған.
Бізге жеткен дерек бойынша, ол Қылмыстық кодекстің 189-бабының 4-бөлігімен (Сенiп тапсырылған бөтен мүлiктi иемденiп алу немесе талан-таражға салу) айыпталған. Ол 200 млн теңге көлемінде мемлекетке зиян келтірген», – деп жазды Orda.
NEGE тілшісі Сыбайлас жемқорлыққа қарсы іс-қимыл агенттігінің баспасөз қызметіне хабарласты. Ондағылар шенеуніктің ұсталғанын растаған да, терістеген де жоқ. Тек «басшылықтың атына ресми сауал жолдауымызды» сұрады.
2022 жылдың 5 шілдесінде Тараз қаласы әкімінің өкімімен Нұрбол Қалдыбаев қала әкімінің орынбасары болып тағайындалған. Н.Қалдыбаев 2009-2010 жылдары Тараз қаласы әкімінің кеңесшісі, қала әкімінің орынбасарлығына дейін қала әкімдігінің құрылыс бөлімін басқарған.
Егер Н.Қалдыбаевтың ұсталғаны рас болып, сот үкімімен кінәсі дәлелденсе, Тараз қаласының әкімі Бақытжан ОРЫНБЕКОВ жауапкершілігін түсініп, орнынан кете ме?
Біз мұны әкімнің өзінен сұрап-білуге тырысамыз.
