Алматыда екі медициналық мекемеге жарылғыш зат қойылғаны туралы ақпарат түсті
Бүгін таңертең Алматы қалалық полициясының жедел басқару орталығына шаһардағы екі медициналық мекемеге жарылғыш зат қойылғаны туралы ақпарат түсті.
Алматы, NEGE. Көрсетілген мекен-жайға жеткен шұғыл әрекет ету қызметінің өкілдері дәрігерлер мен емделушілерді қауіпсіз аумаққа шығарып, ғимаратты тексеру жұмыстарын жүргізді. Нәтижесінде, жарылғыш зат қойылды деген ақпарат жалған болып шықты.
Қазіргі уақытта №4 қалалық клиникалық аурухана мен жедел шұғыл көмек көрсету ауруханасы қалыпты режимде жұмыс істеп жатыр.
- Бұл ақпарат жалған болып шықты. Нәтижесінде екі медицина мекемелері өз жұмыс орындарына қайта оралып, қазіргі таңда осы суыт хабарды, жалған хабарды таратқан азамат іздестірілу үстінде. Оның іс әрекеті қылмыстық кодекстің 273-ші бабы бойынша, саралануда, - деді қалалық Полиция департаментінің ресми өкілі Салтанат Әзірбек.
