Алматы облысында автобус пен жеңіл көлік бетпе-бет соқтығысты: бірнеше адам көз жұмды
Алматы облысында Van Hool жолаушылар автобусы мен Mercedes-Benz автокөлігінің соқтығысуы салдарынан үш адам қаза тауып, тағы үшеуі жарақат алды.
Алматы, NEGE. Жол апаты салдарынан үш адам оқиға орнында көз жұмды, тағы үш адам ауруханаға жеткізілді. Оқиға 27 желтоқсан күні сағат 21.40 шамасында Жамбыл ауданында – Самсы мен Ақтерек ауылдарының арасында болды, деп хабарлады облыстық полиция департаментінің баспасөз қызметі.
Жол ережесін бұзған жеңіл көлікте алты адам болғаны анықталып отыр. Тәртіп сақшыларының мәліметінше, «Алматы-Бішкек» тасжолының 108-ші шақырымында Mercedes-Benz көлігінің 25 жастағы жүргізушісі рөлге ие бола алмай, жолдың қарсы бетіне шығып кетіп, Van Hool автобусымен соқтығысқан.
«Mercedes-те болған үш адам оқиға орнында көз жұмды. Шетел көлігінің қалған үш жолаушысы түрлі дене жарақатымен ауруханаға жатқызылды», – деп хабарлады Алматы облысының полиция департаменті.
Сондай-ақ ведомство жол апатынан рейстік автобустағы жолаушылар зардап шекпегенін атап өтті.
