6,5 миллиард теңге көлеміндегі салық кешірілді
Қазақстандық бизнесмендердің 6,5 миллиард теңге көлеміндегі борышы кешірілді, – деп хабарлайды «Алматы» телеарнасы.
Алматы, NEGE. Телеарна мәліметінше, бұл – көбіне өсімпұлдар мен айыппұлдар. Жалпы елімізде 45 мыңға жуық салық төлеуші салық рақымшылығының игілігін көрген.
«Салық рақымшығы қолданылған салық төлеушілердің жалпы саны – 44 397. Төленген берешек 18,4 миллиард теңге. Ал есептен шығарылған айыппұлдар мен өсімпұл - 6,5 миллиард теңге», – деді Қаржы министрінің орынбасары Берік Шолпанқұлов.
Салықтық рақымшылықты қолданған кәсіпкерлердің басым бөлігі Алматы қаласында. Бұл шағын және орта бизнестің 6 513 субъектісі. Одан кейінгі орында Түркістан, Алматы облысы мен Нұр-Сұлтан қаласы тұр.
«Өсімақылар мен айыппұлдардың қомақты сомасы Алматы қаласының бизнесмендеріне кешірілген. 1 миллиард теңгеден асады. Ақтөбе облысында 1 миллиард теңге, Нұр-Сұлтан қаласында 750 миллион теңге, ал Қостанай облысында 413 миллион теңге кешірілген», – деді Берік Шолпанқұлов.
