Алматыда журналистер сквері жаңартылды
Алматыда көптеген тұрғынның сүйікті орнына айналған ҚР Орталық мемлекеттік музейінің жанындағы Журналистер скверін реконструкциялау аяқталды, деп хабарлады Алматы әкімдігі.
Алматы, NEGE. Сквер аумағы 1,3 га, дені жасыл желектермен және гүлзарлармен көмкерілген. Саябақ аймағының орталығындағы әйгілі композитор Нұрғиса Тілендиевтің ескерткішінің айналасында жан-жаққа бастайтын 9 соқпақ жол бар.
1997 жылы салынған сквер жаңартуды қажет еткен, себебі бұған дейін жөндеу жұмыстары жүргізілмеген. Соқпақ жолдардың жабыны бұзылған еді. Ескерткіштің айналасындағы аумақтың да жабынын ауыстыру қажет болатын. Орындықтар мен қоқыс жәшіктері жарамсыз болып, аумақты көгалдандыруды жаңарту қажеттігі туындаған.
Реконструкция аясында кеспе тас төсеу, жиектастарды монтаждау жұмыстары жүргізілді, 12 жаңа орындық пен 14 қоқыс жәшігі орнатылды, 3,8 мың бұта мен 10 туя ағашы отырғызылды. Сонымен қатар, Меңдіқұлов көшесіне қарай қосымша жаяу жүргіншілер жолы құрылды.
Бүгінде бұл жаяу серуендеуге, көкке шығуға және балалармен демалуға ыңғайлы жаңартылған сквер.
